उ हाँस्यो!!
नाम रुन्चे थियो
तर, आज हाँस्यो
सुनौला दांत
देखायो
कलेटी ओठ तन्कायो
मुख केहि खुल्यो
भित्रैबाट
जिब्रोले धर्ति चियायो
निदार
खुम्चिएजस्तो भो
आँखाको छेउमा
मुजा पर्यो
र त सबैले भने,
उ
हाँस्यो
उ अझसम्म कहिल्यै
हाँसेन
वा भनुं हास्नै
जानेन
वा हास्नु आफ्नो
बसको कुरै ठानेन
कि त उसको मन
खुसी नभएको हुनुपर्छ
कि त हासो आफ्नो
जिन्दगीमै नभएको ठान्नुपर्छ
जे होस्,
आज
भन्दा पहिले कहिल्यै हाँसेको थिएन
तर आज हाँस्यो
आमा सानैमा मरिन
बाउले हँसाउने
फुर्सद पाएनन्
आधापेटमा, मन
बौरिएन
हाड-छालाको डीयाले
हसाउन जानेन
पुस्तकका कुरा
पढ्न जानेन
त्यसैले त उ
हाँस्न मानेन
घरको भित्ताले
रंग मागिरह्यो
छानोको घाउ
बर्खाभरी चर्याईरह्यो
देवताहरु कैद भए,
रामनामीमा राक्षसको हुंकार चल्यो
समाजको मुखमा
ताला लाग्यो
देशमा
सिन्डिकेटको लाईन पर्यो
अब भन्नुस,
उ
कसरी हाँस्न सक्थ्यो
उ हाँस्यो
उ हाँस्नुको कडी
एउतै थियो; भुइँचालो
सबलाई रुवाएपानी,
उसलाई हँसाएको थियो
बर्खाको झरी
जस्तो,
उसलाई रातभरी
उठाएर,
अरुलाई मस्त
निद्रा दिएको थिएन
हुनेखाने र
हुंदाखानेमा,
फरक पर्न दिएन
अपाङ्ग कानुन
जस्तो,
काखा-पाखा गरेन
कालो-सेतो, अग्लो-होंचो,
नेप्टो-चेप्टो, दुब्लो-मोटो
माटो नटेकी माटो
सोस्नेहरुलाई
माटोको गन्ध
सुंघायो
त्यसैले त उ
मुस्कुरायो
भोलिपल्ट;
मुस्कुंराउदै,
रुन्चे डाँडाको मन्दिर चड्यो
मन्दिर भत्किएको,
ताला मारिएको ढोका बन्द्र्यांग अघि
गारोहरु गन्द्र्यांगगुन्द्रुंग छेउ-छाउ
बिचमा एक मुर्ती,
उस्तै शालीन, सभ्य र भब्य
अनि कता कता, मुर्तीमा
आफ्नै मृत बाजेको हात देख्यो
उ खित-खिताएर हाँस्न थाल्यो
भन्न थाल्यो, मैले भगवान देखें
सबले पागल भने
तर उ रोकिएन
चिच्याई रह्यो
मैले भगवान देखें
उ खित्खिताएर हाँस्यो
उ हाँसिरह्यो!!